Williamnagar songjinmani Chaminmingri songo donggipa plastic jabolrangko nama bewalo galchakna tarie dongipa biapona mijal salni bako Swachh Bharat Mission nigita a∙jani MLA aro Cabinet Minister, Marcuise N. Marak re∙ange nirokangaha. Ia tarigimin biapo adita kolrangko songe on∙manahaoba bang∙a bosturangko nangkuenga ine Marak u∙iatangaha. Ia kolrangko chalainagita bijoliko sale on∙a nanganian mangsonggipa dakna nanggni ong∙enga ine Marak uni nirokea ja∙mano koborna parakataha.
Plastic ja∙bolrang samtangtango donggipa a∙a chirangna namen rusianiko ra∙bagipa ong∙ani gimin kraa bewalo gale namgipa kolrangko jakkale maming namgijaniko ra∙bajanagita iako tarie on∙angenga. Ia kolrangko nirok simsakna aro chalaina ru∙utgija somoion Village Water & Sanitation Committee (VWSC) dolni manderangna dingtang mancha skie on∙anggen ine Marak janapataha. A∙jao ia kamko a∙bachengatna man∙agita ja∙kurangko de∙enga aro tarake tarie on∙a jotton ka∙anggen ineba Marak u∙iatangjolaha.
