Da∙al salni bako Umbrella Project-nigita ‘Nokpante’ katta bichongo pangchake workshop ko Tura District Auditorium-o Arts & Culture Department ni ong∙atenggipako a∙bachengatangaha. Ia program-ona GHADC ni CEM, Albinush R. Marak aro WGH a∙jani DC Jagdish Chelani mongsonggipa ong∙e sokbaaha. Unbaksana an∙tangtangni changa sapanio mingsinggiparang jekai Dominic Sangma, Jyoti Narayan, Chekam A. Sangma, Tangsrik A. Sangma, Marborsing Marbaniang aro Balsrame Sangma dongpae programo bakko ra∙angaha.
Ia workshop o dingtang dingtang changa sapanirang jekai jawilwat tariani, ki·tap seani, golpo gitchamrangko seani, dakmesokani, jatni ku∙bisring aro jatni bang∙a doka damanirang jekai dotdrong, chigring unbaksana jabolrangoniko bostu tarianirangko skie ra∙grikna miksonge ong∙atangenga. Ia skie ra∙ani workshopko September 18 tarikoni a∙bachengate September 22 tarikona ong∙atanggen.
Ia Umbrella Project ko dingtang dingtang a∙bao changgipa sapgiparangko damsan rimbachimongna miksonge a∙bachengatangaha. Ia workshopko skanggipa changna re∙anggipa bilsini November jao Shillong songjinmao ong∙atangaha. Arts and Culture department ni Tura songjinmao workshopko ong∙atanichi a∙jani manderangna dakchakbeani ong∙gen ine jawilwat tarirakgipa Dominic M. Sangma janapangaha. Unbaksana jatni daka rika bewal aro doka damarangni gamchataniko ma∙manti kamrangchi jekai dakmesokani aro git ring∙anirangchi sakgipinrangna dakmesokmangmangaigija uarangko ripingangna sakanti chadamberangna ku∙monganikoba on∙angjolaha.
