A∙doko bobil dol dake chakatenggiparang ong∙katbataianina AITC ni dilgipa Dr. Mukul Sangma tangka paisa aro bilrangko jakkalsretani a∙sel ong∙enga ine sorkarini kosako matnange aganangaha. Ia kattarangko ua Jaintia Hills jolo gital bikotgipa bobil dol chong∙motan National Liberation Council of Nongkyndong (NLCN) ong∙kataniko kobor man∙soani ja∙mano parakataha. A∙dokni manderangna kamrangko suale on∙a man∙jaode aro janggi tangani cholrangko sorkario ong∙enggipa chu∙batgipa gadangni manderang ra∙sruke ra∙aiode indakgipa dolrang ong∙kataonan sokaigen ine Sangma janapangaha.
A∙doko songdongenggipa manderangna apsangrik cholrangko suale on∙jaode indakgipa bobil dolrang an∙tangtangni biapna dakgrikna chakattokgen jean ong∙rikrikangkuaigen ine AITC dilgipa parakangaha. Iarangan mikkangchi ong∙gnigipako mesoksoenga aro bebegita ong∙genchimode bilsi 15-20 ona iarangko chakna nanggen ine Sangma aganangaha. Bilsi 15-20 o so∙sojengjeng ong·aniko aro tom∙tomgijaniko sawa namatpilaona ra∙bagen ineba Sangma sing∙doaniko dakangaha.
