Askikandi Village Employment Council (VEC) ko dilenggipa Mofidur Rahman ni kosako sorkarini chamgimin tangka paisarangko jakkalsreta ine Sayad Zaman-ni badi ka∙doangani ja∙mano Demdema Block Development Officer (BDO) Pitinson R. Sangma uni kosako am∙sandianiko dakchina ge∙etangaha. Askikandi VEC ko Mofidur an∙tang saksan Monowara Begum aro uni demechik Zakia Yesmin-ni bimingo kamrangko ka∙enga ine u∙iataha.
Mofidur Rahman MGNREGA-ni niamko pee, salprakni hajirako on∙a chamgimin tangka paisarangko jakkalsretani gimin Pulis dol Indian Penal Code (IPC) ni section 403 aro 406 o pangchake mokordoma ka∙angaha. Koborna parakatanigitade 2020 bilsio ua sakbri sigimin manderang sanna bannanio man∙a nanggni tangkarangko tarie ra∙aha, saksa mandena ge∙gni kamrangko tikataha aro sorkarini kamo ong∙gipa mandena kam on∙aha ine parakataha. Una mikkangchi Askikandi VEC-o maming kamkoba on∙jachina dabian baksana uni kosako raka ja∙kuko de∙china gita badi ka∙doanggipa didiangaha.
