Bilsi 19 ni ning∙o ong∙gipa me∙asarangni cricket kal∙susaaniko da∙aloni a∙bachengate on·angaha. Kal∙anio bak ra∙enggipa dolrangko tokgni dake Zone I aro Zone II ni ning∙ao suale on∙angaha. Zone I o ga∙akgipa dolrangko Ri Bhoi a∙jani Umbuda kal∙chakram biapo ong∙atanggen aro Zone II ni dolrangko NGH a∙jani Salpara o kal∙chakatna tik ka∙angaha. Zone I ni ning∙ao ga∙akgipa dolrangara East Jaintia Hills, East Khasi Hills, West Khasi Hills, Ri-Bhoi, Shillong Cricket Association (SCA) A, SCA (B) aro West Jaintia Hills ong∙a. Zone II ni ning∙ao South Garo Hills, Tura District Cricket Association (TDCA), North Garo Hills aro East Garo Hills dolrang susaangskagen.
Skanggipa salo Umbuda kal∙chakramo Shillong Cricket Association A aro Shillong Cricket Association B susaaniko dakanggen, Salpara kal∙chakramo South Garo Hills DCA aro East Garo Hills DCA ni kal∙aniko nikangskagen. Batanggimin salo bilsi 19 ni ning∙o ong∙gipa me∙chik dolrangni kal∙anio SCA aro Ri-Bhoi dolrang final ona sokdoange SCA dol chegipa ong∙angaha. Apsan dake ia me∙asarangni kal∙susaanioba nambate dakgipa dolrang kosak gadongona sokdoange Zone I aro Zone II ni gisepo susagrikanggen.
