Bajengdoba Sub-Divisional ni Public Health Engineering (PHE) officer Kedia G. Momin ni kosako saksa contractor Tarseng Ch. Sangma uni kam ka∙e man∙gni tangkarangoniko dabie ra∙anina mokordoma ka∙doangaha. Uni kam ka∙ani tangkarang gong 74,64,200 ko okna gita ua officer gong lakh sako am∙skaaha ine ua u∙iataha.
Ua contractor-na Bajengdobani ning∙o donggipa songrangna Jal Jeevan Mission ni kamrangko ka∙na on∙aha aro ua kamrangko matchotani certificate rangkoba on∙manhani gimin bill rangko okna Sub Divisional PHE officer ona re∙angon tangka gong lakh 1 ko bi∙aha ine u∙iataha. Tangka paisarangni gita neng∙nikaniko man∙e hajal 30 ko gamna ku∙chake August 10 tariko Google Pay gita gamataha. Indake ong∙genchimoba bill rangko on∙ningija donaha ineba ua parakataha. PHE officer ni kosako ong∙gija kamrangko ka∙anina Meghalaya High Courto uni sakgni ukil G Ch. Marak and P T. Sangma ni dakchakanichi badi ka∙doangaha.
