South West Garo Hills a·jani Ampati, Multi Facility Centre-o District Mission Coordinator-ni Samagra Shiksha Abhiyan-ko mijal salni bako World Literacy Day-ko gisik ra·e maniangaha. Ia manianio poraiako dontonggipa bi·sarangni bimungrangko segatanikoba dakangaha. Programona South West Garo Hills-ni Deputy Commissioner R P. Marak aro ADC, Y W. Momin mongsonggipa sokgipa ong·e bako ra·angaha. Ia programo ma·a paarang, songni Nokma Sordar rang, skulo skigiparang aro gisiko nanggipa chatro chatrirangni gisiko nangbee bak ra·aniko niknagita man·angaha
Programona re∙bagipa skul re∙aniko dontonggipa bi∙sarangna skie poraianio jakkalgipa bosturangko dingtangmancha suale on·aniko dakangaha. South West Garo Hills-o sak 139 mangnigita skul re·aniko dongtonggipa bi·sarangko Block Resource Co-ordinator (BRC), Cluster Resource Co-ordinators (CRC) on·kange kam ka·gipa skigiparang aro nirokgipa manderangni nokantiona re·e sandianirangko dake nianio ma·sina gita man·aha. Skul re·aniko bi·sarangni dontongani mongsonggipa a·selrangara ma·a paani detangna simsakgijanichi, cholgri ong·anichi, seng·gnang bia ka·anichi, mobile aro internet rangko jakkalsretanichi, dambeoni kam ka·e cha·anichi, pekatgipa bosturangko jakkalanichi ba dingtang dingtang neng·nikani ba obostarangni a·selo ong·enga ine u·ina man·aha.
Ia neng·nikanirangko nambatatnagita a·jao dam sku training center rangko 2023-2024 bilsina a·bachengate on·a ra·chakangaha. Ia center-rango changa sapani training programrangko bi·sarangni gadangko nigrike skie on·aniko dakanggen jedakode bi·sarang nambatgipa skiani gadangko man·a amgen. Ia program o Deputy Commissioner R P. Marak skia poraianiko mikkangchi gamchate ra·na aro ma·a paarangsan ong·aigija pilak songsalni manderangko apsan nangrime skia poraiani gamchatani gimin mikrakatanirangko on·chinagita didiangaha. Bimung segatako man·gipa gital chatro chatrirangkoba bimchipe skie ra·e chu·sokgipa ong·chinagitaba agan ku∙pattianiko dakangaha. Unbaksa poraia skianiko dakanio sorkarini kamrangna mangmang jotton ka·aigija, janggi tangna bading chiwale cha·ani dingtang dingtang cholrangkoba dakangchina didianiko on·angaha.
