U-19 me∙asarangni cricket kal∙susaaniko Salpara kal∙chakram biapo South Garo Hills DCA aro East Garo Hills DCA dolni gisepo susagrikangaha. South Garo Hills DCA dolrang tangka bisil godoanio ame skang dokchengna tik ka∙e chu∙gimik 56 run rangko 12.3 over o wicket gimik ga∙ake man∙angaha. EGH dolni robol gogiparangoni Paisal Ali over 3 o 5 run rangko on∙e sakgittam wicket rangko ra∙e dolgimikoni nambate kal·gipa ong∙aha. Uni dolni kal∙rimskarang Aristo R. Marak, Gulgul Sangma aro Bilgrak Sangma sakgniprak wicket rangko ra∙angskaaha. SGH doloni darangba 10 na bate dokgipa dongjani a∙selo komibegipa run rangkosan tarina man∙aiaha.
SGH dolni tarigimin run rangko chena rikenggipa EGH dolrang chu∙gimik wicket 2 ko ga∙akate 10 gipa over o SGHDCA ko amatna man∙aha jeon Lensbirth N. Marak 25 run aro Aristo Marak 12 run rangko bon∙kamaona wicket ga∙akgija dolko chenagita dilangaha. Paisal Ali ko uni nambee robol goanina kal∙a gimiko nambatgipani bimingna seoke boksisko on∙angaha. Knal salni bako North Garo Hills DCA aro East Garo Hills DCA ni gisepo kal∙aniko dakangskagen jekon pring 9 bajioni a∙bachengatanggen.
Apsandake Umbuda kal∙chakram biapo Shillong Cricket Association (SCA) A aro Shillong Cricket Association (SCA) B ni gisepo kal∙anio SCA (A) dolrang nambee kal∙aniko dakmesoke SCA (B) ni kosako chegipa ong∙angaha.
