Parliament ni sal bongana dingtangmancha asonge chanchirimani session ko ong·atani skanggipa salni matchotani ja·man attamo Cabinet tom∙aniko dake women’s reservation bill ko Union cabinet ra·chakangaha ine koborna parakataha. Ia women’s reservation bill ko 2010 bilsio me·chikrangna 33 percent ko a·kange donaniko Rajya Sabha janape don∙aha jekon da·o Lok Sabha aro State Assembly rango dilgiparangni janape dabianiko daktaianichi ra·chakangaha ine parakataha. Ia cabinet tom·anio Union Ministerrangoni Rajnath Singh, Amit Shah, Piyush Goyal, Pralhad Joshi, S Jaishankar, Nirmala Sitaram, Dharmendra Pradhan, Nitin Gadkari aro Arjun Ram Meghwal bakko ra·e chanchirimangaha.
Ia bill ko ra·gatnagita Parliament session ni adita somoirangni gisepo tik ka·na dal·bea ja·kuko de·anggen ine Prime Minister Modi kobor ra·timgiparangna parakangaha. Dingtang dingtang political dolrang, National Democratic Alliance aro mikkangchakgipa dolrang Parliament session ni skanggipa salo ia bill ko ra·gatnagita rakbee ku·rang on·anirangko dakangaha. Ia bill ko ra·gatnagita Parliament ni bak gittamoni bak gni ni chakpaaniko man·osa iani bidingo ma·mong sorkari ja·ku de·na man·anggen ine u·iatangaha.
