A∙doko dingtang dingtang gadangni kamrangna rimnapanio mikkang niteani gri kamona rimnapaniko dakna aro namdapatna gita sorkari rake kamko ka∙enga ine Chief Minister Conrad Sangma parakataha.
Ma∙mong sorkarini gita kamna rimnapanio mikkangchake sing∙aniko 2016 bilsion dontongate dam 28 a∙dokrang aro dam 8 Union Territory rango ia bewalko dingtangataha. Ia dingtangatanio Ma∙mong sorkari kamna rimnapanio mikkangchake sing∙aniko nitee kamna rimnapaniko bon∙atna gita dontongataha ine Mokaiow ni MLA Nujorki Sungoh sing∙doe agananirangko dakangaha.
Conrad Sangma aganchakaniko dakengon, iani bidingo gitcham Chief Minister 2017 bilsio a∙doko kamna rimnapengon mikkangchake sing∙aniko dakangkuna gita miksonge don∙angaha. Uandakgipa niamko jarikanio banga namgni aro namgijanirangba gnang ineba Sangma parakangaha. A∙doko iandakgipa niamko ra∙gatjani mangsonganiara chadamberangni namgnina chanchie aro kragipa mandeko basee kamona rimnapaniko dakani ong∙a. Unbaksana kamna rimnapanio mikkangchake sing∙anirang donganiara kragipa mandeko basee seokna gita man∙a jeon nambatgipa aro kragipako seoke kamna rimnapanirangko dakna gita dakchaka.