A∙doko Anganwadi Centre rangko songe on∙a song dam 1500 mangnigita dakna nanggnirang dongkuenga jekon Early Childhood Development Project (ECDP) ni gita nirokaniko dakenga ine West Shillong ni MLA aro Cabinet Minister, Paul Lyngdoh aganangaha. Anganwadi Centre rangko man∙a kragipa songrangni dorgasto galaniko niroke sorkari mikkango done kam ka∙aniko Ampati MLA Miani D. Shira ni sing∙aniko dakon, ia songrangona re∙baenggipa bilsi sa ba gnini gisepo Anganwadi Centre rangko ICDS Project nigita ra∙bae on∙a jotton ka∙anggen ine Lyngdoh parakangaha.
Batanggimin salrango bang∙a songrangona re∙ange neng∙nikanirangko ma∙sinagita nirokeaniko dakangaha aro ia re∙baenggipa October jao bak donggipa pilak manderang baksa tom∙bimonge niplaniko dakanggen ine Lyngdoh parakangaha. Taridapaniko nangenggipa Anganwadi Centre rangko ia tom∙anio chanchirime namdapatna ja∙kurangko de∙anggen ineba Lyngdoh parakangaha. Rajabala MLA Dr. Mizanur Rahman Kazi ni Anganwadi kam ka∙giparangna jarikit dormaharangko sokatna janape aganangon jagittamna man∙kugijagipa dormaharangko September a∙bachengo uamangna on∙angaha ine Lyngdoh parakangaha.
