EGH ni District Commerce & Industries Centre (DCIC), PRIME Meghalaya baksa bakrime sal 5 na Entrepreneurship Development Programme ko a·jani biap dam brio ong∙atangaha. Ia programko Samanda C&RD Block-ni Dawa Chipitgre, Rongjeng C&RD Block-ni KTEC-Rongjeng, Williamnagar AH & Veterinary Department-ni VTC aro Songsak C&RD Block-ni Agitokgreo ong·atangaha. Ia program o bakko ra·na re·bagipa bang·batan chadamberang ong∙a jemangan gitalgipa dake cha·ani cholrangko a·bachenggiminrang aro mikkangchi an·tangtangni biltang jaktangchi bading chiwalanio apalbatatna miksonggiparang ong·a. Ia EDP programo chadamberangna bading chiwalani, hisap ki·tapko see rakkiani aro badinganio dakna nanggipa kamrangni bidingo skie on·an baksa didianiko on·angaha.
Ia program o Garo Hills-ni chu·sokgipa entrepreneur-rang baksa agan golpogrike skie ra·na cholrangkoba on·angaha. Chu·sokgipa entrepreneur rang jean Turao bilsi 32 mangna garirangko tarie on·gipa M/s Multi Mobile Precision-ni nokgipa Cheruffin A. Sangma aro PMEGP ni dakchakako man·e chu·sokgipa Williamnagar-oni M/s Odonto Dental Clinic ni nokgipa Dr. Boname G. Momin baksa agan golprikna cholko on·angaha. Williamnagar a·ja bading chiwalanio gisiko nanggiparangna Entrepreneurship Development Programme cum Demonstration Workshop rangko ra·bae biltang jaktangchi dake cha·enggipa bading chiwalgiparangko dakchaknagita mikkangchi ong·atangna miksongangenga ine EGH DCIC parakataha.
