Agia-Medhipara-Phulbari-Tura (AMPT) ramani mitam bak rangko tariangenga aro banggija bakrango kam ka∙na neng∙nikanirangko ma∙mong sorkarini Ministry of Road Transport baksa chanchirime kam ka∙anggen ine Deputy CM Prestone Tynsong parakangaha. Rajabala-Hallidayganj ramani bako kam ka∙anirangko Rajabala MLA, Mizanur Rahman Kazi ni sing∙on, kamko a∙bachengnagita tarisamsoenga aro ru∙utgijaan dakna nangnirangko matchote kamrangko a∙bachengatgen ine Tynsong parakangaha. Sorkari ia ramani mitam bakrangko National Highway ong∙atna chanchianiba donga ineba Tynsong agandapangaha.
AMPT ramako tarina kamrangko ka∙angenga aro ia kamrangara dikdiksa somoio matchotna man∙gipa ong∙ja ine Chief Minister Conrad Sangma agandapangskaaha. Unbaksana AMPT ramani adita bakrangna Meghalaya Integrated Transport Project (MITP) ni gita tangka paisarangko chamate namdapatanggen ineba Sangma u∙iatangaha. Rajabala-Hallidayganj bakni ramarangko tarianio neng∙nikanirangko man∙enga aro iako matchotna somoi nanggenchimoba manderangko chakchike sengpachinaba mol∙molangaha.
