Gambegre ni MLA Saleng A. Sangma Assembly Public Accounts Committee (PAC) Chairman ni kamko wataha ine koborna parakataha. Uni kamko watani miksonganiara Opposition Chief Whip ni gadangko jako ra∙e kam ka∙nagita donskaani gimin watna nangaha ine u∙iataha.
Ru∙utgija salrangna skang Meghalaya Legislative Assembly-o Committee ni Chairman ko seokna gita Assembly Secretariat o Minister ni gadang baksa apsanggrikgipa kam donggipa ong∙na nangjawa ine dongimin niamo pangchake kamoniko wataha ine Sangma parakataha. Uni kam wataniko Deputy Chief Minister aro Parliamentary Affairs ni incharge, Prestone Tynsong ra∙chakangaha aro ru∙utgija somoirangni gisepon gitalgipa Chairmanko seokanggen ine Assembly Session o parakangjolaha.
