US’ Internal Revenue Service (IRS) call centre ni bimingo tol·e chalaidilgipani kosako investigation agency rang am·sandianiko dakna nangenga ine All India Trinamool Congress (AITC) ni dilgipa Dr. Mukul Sangma aganangaha.
Batanggimin 2017 bilsio tol·pinike tangkarangko kamaina sak hajalsa mangnigita manderangoniko tangkarangko cha·bokangaha. United States, United Kingdom aro gipin a·songni manderangoniko tangka cha·bokani bidingo IRS o kam ka·giparangko a·dokni pulis dolrang rim·ani ja·mano IFA Enterprise Call Centre jean Shillong songjinmani Dhankheti SS Netcom o chalaienggipakoba pulisrang napdrae am·sandianiko dakangaha.
Investigating agency dolrang state law enforcing machineries, investigating machineries, a·songni aro gipin a·songni agencyrang baksa bakrime am·sandianirangko dakgenchimode a·sol ja·pang jadilrangko u·inagita man·gen ine Sangma aganaha. Ia bakrime kam ka·anirangko dakjagenchimode maming saloba chong·motgipa mandeko rim·nagita man·jawa aro manderangna am·sandianiko dakmike meokanisan ong·aigen ine ua agandapangaha.
Iako janapani miksonganiara ia mokordomani kosako da·alo mai ong·engaha aro iani bidingo investigating agency rang nambate a·msandianirangko dakengama ine Sangma janapa gnang sing·doangaha. Am·sandianirangko bakrime daknagita state agency, state authority aro a·dokni pulis departmentrangni kam ong·a ine Sangma aganangaha.
