A∙doko Uniform Civil Code (UCC) bill ko ra∙gatgenchimode songdongenggipa manderangna namen neng∙nikaniko ra∙bagen ine Mawhati ni MLA Charles Margnar aganangaha. UCC ko ra∙gatanichi niamrangko tarigipa District Council ni kam ka∙aniko bilgriatgen aro a∙songni Sixth Schedule ko nosto ka∙a ga∙akgen ine ua aganangaha. An∙chingni dakarika, bebe ra∙anirang aro a∙dokni manderangni dingtanggipa dakbewalrangko gimaataona sokatjachina UCC ko ra∙gataniko jegalchina sorkariko didiangaha. Iani bidingo Charles Pyngrope, Miani D. Shira, Saleng Sangma, Ronnie V. Lyngdoh aro gipin dilgiparangba UCC ko ra∙galna jinmaona ra∙baaniko jegalpae aganangaha.
UCC ko ra∙gataniara India a∙songni dongimin niamrangni kosako chakatani ong∙a jekon da∙o dipet bill ni bidingo ma∙mong sorkarioni name talataba dongkuja ine Chief Minister Conrad Sangma aganangaha. Bill ko ra∙gatanichi Northeast aro Meghalaya a∙doko changalanirangko darangan u∙ija aro bill ni gimin name ma∙sigija jegalsoniara namgipa ong∙ja ine Sangma janapangaha. Ia bill ko ra∙baanichi chonchongipa aro a∙doko songdonggipa manderangni daka rika, bewal aro bebe ra∙aniko gimaatna nanggenchimode sorkari maming saloba UCC ko ra∙chakna man∙jawa ine Sangma aganangaha. A∙songni dongimin niamo pangchake a∙dokni manderangna neng∙nikaniko on∙ode dilgipa sakantian UCC ko ku∙cholsan jegalna nanga ine Sangma agandapangaha.
