Ta·maku jakkalaniko aro ta·makuko jakkale bang·a namgija obostarangona sokaniko champengnagita West Garo Hills a·jani Pulis dolrang aro a·dok sorkarini Health Department baksa nangrime skul sepangrango ta·maku palaniko aro mande jinmao ta·maku ringaniko champengnagita niamrangko ra·gate kamrangko ka·anggen ine parakangaha.
Ia kamrangko Cigarettes & Other Tobacco Products Act (COTPA) ni ning·o pangchake ka·anggen aro ia kamrangko chu·sokatnagita talbate skie ra·na National Tobacco Control Program (NTCP) Sambandh Health Foundation (SHF) baksa nangrime trainingko ong·atgipao WGH ni Pulis dolrang skie ra·na bakko ra·angaha. A·doko ta·maku jakkalani a·sel janggiko gimaatgiparang bilsio sak 8,000 mang ong·enga ine Tura ni SP janape jajrenganiko mesokanga gnang iani bidingo COTPA o pangchake kamko ka·na ja·ku de·na nanggen ine parakangaha. COTPA ni niamo pangchake skul sepangrango ta·makurangko palna beng·ani niam ko pegenchimode adita Officer-in-Charge (OC) rangko fine gamatchinaba Tura ni SP ge∙etaniko dakanggaha.
Tura Christian Hospital ni surgeon aro Voice of Tobacco Victims (VoTV) ko dakdilenggipa Dr. Siddharth K. Sangma ta·makuni a·sel ong·enggipa obostarangko champengna gita COTPA ni niamrangko ja·rikan baksana ta·maku jakkalaniko champengna aro ta·makuko gelna skie on·ani program rangko ong·atanichi bang·a manderangni janggiko naljokatna dakchakani ong·gen ine aganangaha. Global Adult Tobacco Survey (GATS) 2017 ni gitade Meghalaya a·doko lakh 10 (47 per cent) nigita ta·maku jakkalgiparang gnang aro 5 per cent mangna komie ta·maku jakkalani rantako manderang gelna man·enga ine u·iataha.
Global Youth Tobacco Survey (GYTS) nigita Meghalaya a·doko 34 percent nigita bilsi 13 oni 15 ong·gipa bi·sarang ta·maku jakkalenga aro ian bilongen jajrenganiko ra·baani ong·enga ine Meghalaya ni State Nodal Officer of NTCP, NHM, Dr. Lana L. Nongbri aganangaha. Ia ong·enggipa obostarangoniko champengna COTPA Section 4 o pangchake Pulis Station rangni mikkango aro adita nikrangragipa biaprango ‘No Smoking’ ko tape donnagita SP tik ka·angaha.
