Re·baenggipa September 24 tariko chang 154 gipa Garo Hills Day ko gisik ra·e ‘Aman A·song Awareness Cum Prayer’ ko attam 4 bajio Tura District Auditorium o ong·atgen ine Tura ni MDC Bernard N Marak u·iatangaha. September 24 tariko dilgiparang sorkari baksa songgigrike soi ka∙angaha aro ian an∙chingni Garo Hills ko jakgitele man·ani sal ong∙a ine Marak parakangaha. Ia salon 1869 bilsini Garo Hills Act o pangchake Garo Hills ko district ona ra∙gataha ine Marak u∙iatangaha.
Ia salko gisik ra∙anigita a∙songna janggi on∙chakgipa A∙chik jatni sianggimin matgrikrangna aro Manipur a∙dokna bi∙chakaniko dakanggen ine koborna parakataha. Ia somoio Garo Hills ni itihas aro jatni dingtang dingtang chanchirimna nanganirangko marak agane on∙anganiko dakanggen.
