Williamnagar College-ni bang·a chatro chatrirang Garo Students’ Union (GSU) Eastern Zone office-ona re·ange GSU dilgiparangna pu∙onaniko ong·atani bidingo tom·e chanchirimaniko dakangaha. GSU Eastern Zone-ni dilgiparangni jako ra·e dilani ia bilsi September jaon bon·engaha aro re·baenggipa October jao class 10 aro 12-ni porikkarangba ong·nakengani gimin somoirang apchangket ong∙enga ine u∙iatangaha. GSU Nengkra Regional Unit-ni pu∙onaniko ong·atani somoiba porikka baksa apsan somoio ong·engani gimin Eastern Zone ni dilgiparangna pu∙onaniko ong·atnagita adita somoirangko ra·dokuna chanchirimangaha. Ru·utgija somoini gisepon Election Commission ko seoke gitalgipa sal somoirangko u∙iatgen ine chakchike sengangpakuchina GSU dilgiparang chatro chatrirangko mol·molangaha.
GSU ni dilgiparangna pu∙onaniko ra·doatna nangani mongsonggipa a·selara GSU Office-ko badiaba political dolrangni ra·sekdrana ja·ku de·ani aro political dolo an·tangtangko biming segatgimin manderangni kragija jaksi otani gimin ong∙a ine GSU dolrang parakangaha. Ian da·o ong·enggipa dilgiparangko kratchaatna miksongani ong∙a aro politics-ni dakrongbewal gita kajia golmal ka·aniara kraani ong·ja ine GSU dilgiparang aganangaha. Indakgipa kamrangko ka∙anichi politics-oni ma·ekatgimin A·chik jatni ge·sa bilakgipa chatro chatrirangni dolko bilgriatani ong·gen ine GSU ni dilgiparang parakangaha.
Chatro chatrirang darangba politics-o jak dongna man·ja aro badiaba political dolni didianiko man·e ding·chaoatani ba kajia ong·atna miksongani dongna nangjawa ine dilgiparang janapangaha. Saoba ia cholko ra·e kajia ong·ataona sokatgenchimode GSU maming dakeba jako ra·jawa aro ding·chaoatgipa dolrangan daitoko ra·na nanggen ine GSU ni dilgiparang mikrakatanikoba