GHADC-o kam ka·gipa gitcham aro songsalni namgnina re·mikkanggipa Flaming B. Marak ni batanggimin salo Public Interest Litigation (PIL) ka∙anina aganchakatengon Meghalaya High Court sorkariko a∙doko salanti bijoli den·aniko dontongate name watchina ge∙etatskaaha. A∙doko bijoli den∙aniko chagrongna nange neng∙nikaniko man∙anina Marak sorkarini kosako name kam ka∙jaenga ine re∙anggipa salrango PIL ka∙angaha. Marak-ni PIL o mongsongbate ding·karini jarango a·doko basea gnang bijoli watanirangko dakenga ine department ko matnangataha. Garo Hills o dingtangmancha Tura o salantian konta gnina bijoli den∙aniko dakenga aro bang∙bata somoion gipin a∙jarango changni chang bijoli sianichi neng·nikanirangko chagrongenga ine parakangaha.
Iani bidingo High Court sorkariko raka ja∙kurangko de·e neng∙nikanirangko komiatna aro maming sinjeta gri bijoli wataniko ja·rikchina sorkariko ge∙etangaha. Unbaksana hospital rango sanna bannaniko dakanio aro rang∙gittik a∙sel ong∙anirango maming champengani donggija kam ka∙na man∙agita hospital rango bijoli den·aniko ra·galchina September 20 tariko ge·etaniko dakangaha. Ia obostarangoniko nambatatna aro bijoli watanirangko a·dokni manderangni namgnina sorkari ta·raken kamrangko ka·anggen ine Meghalaya High Court ka·dongsoaniko parakataha.
