Meghalaya Legislative Assembly Autumn Session ni gittamgipa salo Mizoram a∙dokni Henry Lalremsanga ni kosako pekatgipa bosturangko bading chiwalanio niksenggipa mande ong∙a ine Dr. Mukul Sangma ni matnanganina kobor rangko man∙soe uni kosako kragija bimingko ra∙bana jotton ka∙e jaksi otanina gong crore 20 ko gamchina badi ka∙doangaha. Uni bimingko ra∙e kragija kattarangko agananina 2B’s company ni Chairman Henry Lalremsanga, Mukul Sangma ko salsni ni gisepo gong crore 20 ko gaman baksa kema bi∙china aganatskaaha.
On∙gimin somoigita dakna nanggnirangko dakjagenchimode Sangma ni kosako rakbata ja∙kurangko de∙anggen ine koborko man∙soaha. Sangma na on∙atgipa lekkao pilak uni kosako rasong be∙atna agangipa kattarangko kema bi∙e nampilaona sokatna janapatani gnang aro jinmana aganparakaniko dakengon Supreme Court ni ge∙atanio pangchake saksa sakgipinni kosako kragija agana man∙gijanikoba janapataha.
Kobor rangko parakatanigitade Lalremsanga ko re∙anggipa 2013 bilsio license gnang samrangko gario salangako badingsrukgipa ine potchipe rim∙aniko u∙ina man∙aha. 2018 bilsio Special Court, ND & PS Act, Patiala House Court, New Delhi, uni kosako kraagita sakkirangko man∙jae watna nangaona sokaha.
