Meghalaya Legislative Assembly session o Artificial Intelligence (AI) ko jakkale dilgiparangni agangimin kattarangko joljol see ra∙rikaniko dakangnagita Speaker Thomas A. Sangma ni dilanichi a∙bachengataha. Ian gitalgipa technology rangko jakkale assembly-o chanchirimaniko namdapatna ja∙ku de∙ani ong∙enga ine parakataha.
Assembly-o chanchirimanirangko nambate knachanggija tiktak ong∙e see rakkianiko dakna Assembly Secretariat ni Chief Reporter, Arnica Lyngdoh aro IT Cell Computer Programmes, Dapborlang Marwein bakrime kamrangko ka∙angenga. IT Cell aro koborko parakatimgipa dolgni bakrime kam ka∙anganichi assembly ni ning∙ao chanchirimaniko see rakkianio nambata biterangkoba nikna gita man∙enga.
Artificial Intelligence ko assembly ni ning∙ao Reporter’s Branch-o jakkalaniara somoirangko bakandikate ta∙rake see rakkianiko dakna gita man∙ani ong∙a. Meghalaya sorkarini a∙doko kam ka∙anirango technology ko jakkale nambata gadango kam ka∙angna gisiko nange ja∙ku de∙ani ong∙enga. Meghalaya Assembly-o AI ko jakkalaniara gipin assembly rangnaba mikkangchina namgipa dakmesokaniko on∙a gita ong∙enga. 2023 bilsini Autumn session-o chanchirimanirangko donua gri kam ka∙angna aro namdapataniko dakna NeVA (National e-Vidhan Application) reporter module ko jakkalenga. IT Cell aro Reporter Branch ni AI ko jakkale kamrangko ka∙anio namdapatanina a∙dokni ku∙wattimgipa, aro Commissioner Secretary uamangni chu∙ongnikaniko parakangaha.
