Batanggimin salrango saksa contractor, Tarseng Sangma ni kam ka∙gimin bill-ko okna Bajengdoba PHE ni SDO, Kedia Marak ni tangka bi∙aniko pulisrangna badi ka∙na janapaniko ra∙chakjani gimin Bajengdoba Police Station-ni OC ni kosako matnangataha. Badi ka∙aniko ra∙chakani pal Bajengdoba PS-ni OC batesa uko ka∙mikenataha ine koborna parakataha jeon ua da∙o OC ni kosako badi ka∙doangskaaha.
SDO ni kosako Sangma uni kamko gipin contractor na kragijadake on∙ani giminba Meghalaya High Court-o dingtang dake badi ka∙doangaha. SDO ni kosako PHE department ni Commissioner aro Secretary ona re∙ange uni namgijagipa kamna kraa ja∙kurangko de∙chinagitaba didiangaha. Iani bidingo North Garo Hills SP Bruno Sangma ni janapatani gitade ia mamlani bidingo sing∙sandianirangko dakangenga aro kraa ja∙kurangko de∙anggen ine ua parakataha.
