Disaster Management ni Special Rural Works Programme (SRWP) ni ning∙o chamatgimin gong crore 2 lakh 50 tangkarang chu∙ongjaengani gimin Gambegre ni MLA Saleng A Sangma bariatchina Chief Minister Conrad Sangma ko didiangaha. Ia chamatgimin tangkarangko constituency ni nanganirangna chu∙ongagita sokatna man∙rongja unbaksana a∙doko mikka balwa aro gipin niksamsona man∙gijagipa a∙selko chagronggipa nokdangrangnaba mikkangchi sokatna nanggenchimode chu∙ongjaenga ine Saleng janapangaha.
Iani bidingo aganchakaniko dakengon, North East a∙dokrangni gisepo Meghalaya a∙dokan SRWP ni ning∙o ma∙mong sorkarini gita bang∙batgipa tangka paisa chamataniko man∙gipa a∙dok ong∙a ine CM aganangskaaha. Ia chamatgimin tangka paisarangko gipin department rangnaba suale on∙a nanga jekon bariatna man∙janaba donga ine Conrad Sangma aganangaha. Ia kamrangko ka∙na tangka paisarang donganiko nigrikesa ja∙ku de∙na man∙gen ine Chief Minister parakangaha.
