Umbrella Project-nigita ‘Nokpante’ katta bichongo pangchake re∙anggipa September 18 tarikoni ong∙atanggipa workshop da∙al salni bako name tom∙tome matchotangaha. Ia workshop ko Arts & Culture Department nigita Tura District Auditorium-o A∙chik rangni dingtang dingtang dakbewal aro doka damani bidingo skie on∙agita ong∙atangaha.
Ia workshop-ko oprakani salo GHADC ni CEM Albinush R. Marak aro WGH a∙jani DC Jagdish Chelani mongsonggipa ong∙e sokbaaha. Unbaksana an∙tangtangni changa sapanio mingsinggiparang jekai Dominic Sangma, Jyoti Narayan, Chekam A. Sangma, Tangsrik A. Sangma, Marborsing Marbaniang aro Balsrame Sangma bak ra∙gipa chadamberangna name skie on∙aniko dakangaha.
Ia workshop o dingtang dingtang changa sapanirang jekai jawilwat tariani, ki·tap seani, golpo gitchamrangko seani, dakmesokani, jatni ku∙bisring aro jatni bang∙a doka damanirang jekai dotdrong, chigring unbaksana jabolrangoniko bostu tarianirangko skie ra∙grikna miksonge ong∙atangaha.
Ia workshop ni bon∙kamgipa salo bak ra∙na re∙bagipa chadamberangna dakmesokani, chigring aro dotdrong dokani a∙barango susagrikanirangkoba ong∙atangaha. Bak ra∙anggipa chadamberang ia susagrikanio gisik nangbee dakmesokangtokaha. Chigring aro dotdrong doksusaanio skanggipa biapko Mount Blair D. Sangma aro Zinggo A. Sangma man∙angha, gnigipa biapko Derasha M. Marak aro Kraismith R. Marak man·angaha aro gittamgipa biapko Myron N. Sangma aro Akim D. Shira man∙angskaaha.
Apsan daken Art in a community-o pangchake dakmesokaniko dakanggiparangni gisepo skanggipa biapko Chenno D. Sangma, gnigipa biapko Tintin D. Marak aro gittamgipa biapko Mathatius A. Sangma man∙angaha. Workshop ni bon∙kamao chegiparangna certificate aro tangka paisa ni boksisrangkoba on∙aniko dakange bak ra∙gipa sakantikon mittelpilskaaniko dake matchotataha.
