Garo Hills ona broiler do·oko ra·bagiparangoniko niamgri kajinarangko gilani a·sel ra·bagiparang komienga aro broiler do·oko man·a gita neng·engani gimin damrang tang·doenganiko nikna gita man·enga. Ia obostako mongsongbate Tura o nikna gita man·enga jeon kimil galgimin broiler do·oko kg prako gong 300 oni 350 damrango palenga. Re·anggipa salrango ia do·oni damrang batbeoba gong 260 oni 280 onasan damrang tang·doaianiko nikronga.
Tura ni Broiler Chicken Wholesalers Association ni u·iatani gitade Assam oni Garo Hills ona re·bamitingo sima ariko napmitingrango niamgri tangka gilanirangko dakrongenga. Iani a·sel Garo Hills ona re·baanio neng·nikaniko man·rongenga ine uamang janapangaha.
North Garo Hills a·jani Bajengdoba Police Station ni sepang jolo neng·takate an·tangtangko Veterinary Department ni ine agane do·o salbagiparangoniko tangka gilronga ineba u·iataha. Iani bidingo uamang daito ga·akgipa department aro Bajengdoba PS na u·iataniko dakmanahaoba mangming ja·ku de·anirang dongja ine aganangaha.
Bajengdoba jolo do·orangko salbaenggipa garirangoniko changprako gong 20,000 tangkarangko do·oni sabisi-rangko pa·sike gilanirangko dakronga ine janapangaha. Iano saksa Migam Pegu minggipaba bak donga ineba uamang aganangaha. Ia a·selrangni gimin Garo Hills ona do·o salanirangko don·tongatna nangao ga·akenga aro damrang tang·doaniko nikna gita man·enga. Iani biding daito ga·akgipa authority ko nirokatchigita didianiko dakangaha unbaksana Tura Municipal Board aro a·jani pulis dolrangna Association rang chitti sedoanikoba dakangaha ine parakataha.