South West Garo Hills a·jao Swachhta Hi Seva ko anti gnina ong·atanio gipin songrangni gisepo Sulguri-A song rongtal an·tale rakkianio nambate kam ka·gipa ong·anina Swachh Survekshan Grameen ni gita mijal salni bako Ampati o mande ra·aniko man∙angaha. Ia program ko a·jani Swachh Bharat Mission Grameen (SBMG) ong·atangaha jeon Deputy Commissioner aro SBMG ni Chairman R P. Marak, ADC Dr. Rezina Ch. Marak, PHE ni Executive Engineer aro SBMG ni Member Secretary Raju P. Marak, Zikzak C&RD Block ni BDO D Hajong, SBMG ni District Co-ordinator T A. Sangma, a·jani official rang, SBM aro JJM o kam ka·giparang unbaksana songni manderangni dongpaanio Sulguri-A songni dilgiparangna certificate baksa tangka paisarangko on·angaha.
Swachhta Hi Seva ko anti gnina ong·ataniko October 2, 2023 tariko ‘Waste Free India’ katta bichongo pangchake ru·uta bilsini ja·man ia chu·sokaniko janape dingtang dingtang kamrangko a·jao ka·anikoba DC aganangaha. Sulguri-A songni manderang aro dilgiparangko rongtal an·tale rakkianio nambate kam ka·anina nama sikaniko on·an baksa uamangni kamrangko nike gipin songrangnaba ja·rikpana skiani ong·anggen ine DC aganangaha. Swachhta Hi Seva campaign ni somoio songko noko rongtalataniko antiprako changgni dake daknagita didianiko on·angaha. Songko nokko rongtal an·tale rakkina aro jabolrangko name galna DC office nigita aro a·jani Municipal Board rang dakchakanggen ineba DC aganangaha.
