Megha Health Insurance Scheme (MHIS) ni gita sanna bannaniko jako ra∙e kam ka·enggipa Nodal agency, Ayushman Bharat Pradhan Mantri Jan Arogya Yojana (AB PM-JAY) o chonchongipa a·dokrangni gisepo Meghalaya a·dok nambatsrange kam ka·gipa ong·e Ayushman Utkrishtata award ko man·angaha. Ia boksisko ma∙mong sorkarini National Health Authority ni Delhi o salgnina ong∙atanggipa Arogyan Mandhan 2023 program o pakwatangaha.
Skanggipa boksisko October 2022 oni September 2023 ona bang·bate manderangko sanna bannanio nambatsranggipa a∙dokrangoni ge∙sa ong∙pae man∙angaha. Apsan daken gnigipa boksisko October 2022 oni September 2023 ona me·a me·chik basegija sanna bannanio nambate dangdike on∙gipa aro bang·a manderangko dakchakanio nambatgipa ong∙ao pangchake man∙angskaaha.
Ian sanna bannanio chonchongipa a∙dokrangna uamangni nambate dakaniko nigrike boksisko on∙ani ong∙a. Ia somoio AB PM-JAY ni 2018 bilsioni a∙bachengate chu∙gimik bilsi bonga gapanikoba gisik ra∙e man∙ianiko dakangjolaha.
