West Garo Hills a∙jani Bolchugre Health & Wellness Centre (HWC) ni ning∙o donggipa Bolchugre Higher Secondary skulo Health Mela Cum World Environment Day aro School Health & Wellness program ko Ayushman Bhav Campaign ni bak gita ong∙atangaha.
Ia melao skulo poraienggipa chatro chatrirang aro skigiparangko batrikrikgijagipa sabisi, Tuberculosis (TB) ko porikka ra∙an baksana an∙chirangko porikka ra∙na chimonganiko dakangaha. Anaemia sabisi, be∙enna namgipa cha.anirangni gamchataniko, bilsi chu∙onggija an∙o dongani bidingo u∙iatani, gisikni gita neng∙nikaniko man∙giparangko talbate u·iani aro dongchakgipa biapni wilwilako rongtal an·tale rakkiani gimin manderangna agantalate on∙angaha. Ia programni bako be∙enni an∙seng baljokanina aro mangrakanina ranta ka∙anigita Yoga koba chatro chatrirangna skie on∙angjolaha.
