West Garo Hills a∙jani Anti Narcotic Task Force (ANTF) dolrang pekatgipa bosturangko niamgri bading chiwalgipa mande saksako rim∙na man∙aha. Tura songjinmao songdongenggipa Kamendra Rishi ko jinma songreenggipa bus o chanchichipgipa heroine bosturangko ra∙angmiting somoio ANTF dolni District Executive Force (DEF) rang change rim∙na chu∙sokgipa ong·aha.
Dosi dakgipa mandeni kosako Narcotic Drugs & Psychotropic Substances (NDPS) Act o pangchake badi ka∙doangaha. Koborrangko parakatani gitade ia pekatgipa bosturangko Tura songjinmao bading chiwalna ra∙baenga ine ma∙sina man∙aha. ANTF dolrangni gisiko nange nirok sandianio Kemendra Rishi ko ia pekatgipa bosturang baksa rim∙na man∙aniara pulis dolrangna mingsa chu∙sokani ong∙a.
Batanggimin salrango a∙dokni pilak bakrango pulis dolrangni nirokanichi dingtang dingtang a∙jao ia kamrangko ka∙gipa manderangko rim∙aniko nikangna man∙enga. Unbaksana a∙ja antini pulis dolrang ia kragija kamrangoniko champengna man∙agita bajar a∙dam aro songsalrangona re∙e mikrakatani programrangko ong∙atangenga.
