A∙dokni skulrangko chalaianio nambate dakna Teacher Information Management System (TIMS) ge∙sa mobile o salantio biming segatna tarigipa appko jakkalna mijal salni bako bang∙a DSEO rang, SDSEO rang aro a∙jani kam ka∙rimskarang baksa online gita dake nianiko ranta ka∙angaha. Ia mobile app ko jakkalnagita app ko tarigiparang uamangna skie on∙an baksa agantalateba on∙angjolaha.
Ia appko skanggipa ge 372 Secondary, Higher Secondary aro Upper Secondary Government skulrango jakkalanggen ine u∙iatangaha. Mobile attendance app ko Education Minister Rakkam A. Sangma September jani 5 tariko oprake on·angaha jeon dam 12 a·jarango ge 14 skulrangna app ko jakkalna June aro July jarango skianiko matchotangaha.
Ia app-ko jakkale salantio biming seaniko mesokani, biaprangko ma∙siani, skigiparangni gimin u·iataniko on·ani aro kakketgipa somoio ong·engako parakatanirangko man·a amgen. Unbaksana ia app-ni dingtanggipa bako mikkangko nie u·iani aro Mid-day meal-ni gimin salantio u∙iatanirangko 2.0 version-o man·angskagen.
