Baghmara Don Bosco Higher Secondary School Hall-o Meghalaya Early Childhood Development Programme-ni bidingo a∙jani manderangna skie on∙anirangko dakangaha. Ia tom∙anio Baghmara ni Block Development Officer (BDO) J. N Sangma, Meghalaya Early Childhood Mission-ko a∙doko kam ka∙ani bidingo mongsongbate me∙chikma, bi∙sa aro chadamberangni an∙seng baljokaniko skang done namdapatna kam ka∙anirangkoba janapangjolaha.
Ia programko Social Welfare, Community and Rural Development, Education aro Health and Family Welfare department rang nangrime Meghalaya Early Childhood Development Mission-ni gita a∙doko dal∙drobaenggipa bi·sarangni an∙seng baljokanirangko niroke namdapatna rakbee kam ka∙angenga.
Ia mission-ni gita je song aro bi∙sarang Integrated Child Development Scheme (ICDS) programme-ni ning∙ao dongkujachim, uamangko am∙sandie bi∙sarangni dal∙droaniko namdapatna kamrangko ka∙angna miksonge ja∙ku de∙ani ong∙enga ine DRDA ni Project Director P. R Marak u∙iataniko on∙angaha. Indakgipa ja∙ku de∙anirangko dakanichi a∙doko bi∙sarangni dal∙droaniko namdapatna dakchakasan ong∙ja indiba bi∙sarangni ma∙aparangnaba nokdangni an∙seng baljokanina dakchakbeani ong∙gen ine ua janapangaha.
