A·doko International Year of Millet ko maniani bak gita Misini workshop aro exhibitionko salsana All Saints Hall, Shillongo Department of Agriculture & Farmers’ Welfare ong·atangaha. Ia programona Agriculture Department ni Secretary Isawanda Laloo mongsonggipa sokgipa ong·e bakko ra∙angaha. Ge∙e game cha∙anio chasong gitalni kolrangko jakkalani ja∙mano mi aro gom mi rangkosan ge∙anirangko nikna gita man∙aiaha aro gamchatbegipa misiko ge∙nade gisiko nangjaha ine Laloo aganangaha. Misiko ge∙na altubegipa ong∙a aro bang∙e neng∙nikanirang dongja ine ua agandapangaha. Misiko cha·anichi be·ena namgni ong·aniko aro gamchataniko u·ie ra·e misiko ge·taipilna game ge·e cha·enggiparangko ua didiangaha.
A·dokni dingtang dingtang bakrangoni misiko ge·giparang ia programo gisik nangbee bak ra·angaha. Ia programo misini bang∙a rokomrang aro misioniko tarigipa cha·ani jekai biscuit, cake, ruti aro ringanirangko mesokangan baksa pala sim·anikoba dakangaha.
