WGH Selsella jolo songdongenggipa manderangni palo A∙chik Students’ Welfare Association (ASWA) dolrang nosto ong·e dongenggipa Wakantagre aro Chibongagre songni L.P Skul nokrangko name taridape on·china gita a∙dokni Education Minister Rakkam Sangma-na mol∙molani chittiko sedoangaha. Ia janapgimin skulrangni nosto ong∙aniara ru·utbea somoirangna tarigija donchipani a·sel ong·aha ine u·iataha. Ia skul jolni chatro chatrirangna poraia skiani a·bao ru·utbea bilsirangonin namen dakchakaniko on·enggipa ong∙a ine ASWA dolrangni janapatanio ma∙sina man∙aha. Ia skulrangni nosto ong·anichi bi·sarangna aro skigiparangna maming naljokani dongja, unbaksana poraie skie ra·anikoba champengani ong·a ine ASWA parakataha.
Skulko taridapna nanganirang skul nokosan ong·aigija asongchakani bosturangko nangdapani, paikanarangko tariani, nokkingko gital pinne on∙ani, pakmarangko tariani, bijoli aro chirangko jakkalna pipe rangko sale on·china ASWA dolrang janape chittio parakataha. Iako tarie on∙anichi skia poraniko namdapatasan ong∙aigija songsalni chu∙gimik tangdoaninaba dakchakani ong∙gen ine uamang janapangaha. Selsella jolo bi∙sarangni mikkangchi janggi tangani skia porani gadango pangchaka ine janape sorkariko ia neng∙nikanirangko niatpachina ASWA mol∙molangaha aro ia kamo sorkari baksa chu∙gimik bakrimaniko on∙a ku∙chakangaha
