Meghalaya a·dokni Pnar jatrang aro Assam a·dokni Karbi jatrang baksa sima ari jolo a·dok damgni ni gisepo nanggrikanirang West Jaintia Hills ni Lapangap songo tom·tomanirangko niktaipilna man·angaha. Kajia golmalrang tom·tomanggenchimoba, songni nokma sordar D. Lyngdoh ni aganani gitade uamangni gisepo suk ong·gijanirang dongkuenga ine parakataha. Tom·tomaniko ra·banagita da·al salni bako a·jani SP aro DC bakrime chanchirimaniko dakangenga. Damgni a·dokrangni gisepo uamang ku·cholsan ong·e paltangtangni jolrangko name nirokanirangkoba dakangenga ine WJH a·jani Deputy Commissioner BS Sohliya aganangaha.
Mijal salpaksani somoio sima ari jolo a·dok damgnini ka·o nange jingjengataniko dakgipa manderang tom·dake nanggrikna a·bachengbaaniko pulis dolrang bakan tom·tomaona ra·bapilna man·aha. Assam ni pulis dolrang uamangchipakni jingjengatgipa manderangni tom·dake hala ka·aniko a·rikgalnagita tear gas rangko goaha ine DC parakataha.
Assam a·dokni Chief Minister uamangni bakgita golpoanirangko dakangaha aro sima ari jolo nanggrikengani gimin ru·utgijan tom·e chanchirimanggen ine Cabinet Minister Paul Lyngdoh kobor ra·timgiparangna parakataha. Sima ari jolo manderangni gisepo nanggrikaniko 2023 bilsi bon·a skangan Assam a·dok baksa bon·kamgipa MoU ko soi ka·e manderangni meligrikgijaniko tom·tomaona ra·bagen ine Lyngdoh agandapangaha. Kajia golmal ong·enggipa biaprangko nirokaniko dakani bidingo sing·aniko dakon, ru·utgija salrangni gisepo Deputy Chief Minister rang ua biaprangona re·ange nirokaniko dakanggen ineba Lyngdoh u·iatangaha
