A·doko buring bolgrimrangko ripingna ku·mikchetgimin kamrangko name ka·anina TV18 network mande ra∙bee Green Ribbon Champions Award ko New Delhi, Hyatt regency o ong·atgipa program o Meghalaya a·dokna on·angaha. Ia tom·aniona Cabinet Minister Ampareen Lyngdoh okamatako man∙e Meghalaya a∙dokni palo award ko ra∙chakaha. Ian a∙dokni buring bolgrimrangko ripingna bimchipe kam ka∙anina mande ra∙e on∙gipa award ong∙a.
Meghalaya a·dok 2019 bilsio India a·songo Integrated Water Policy ko skanggipa ra·gatchenggipa ong·a aro una agreba Water Mission ko a∙bachengate tangkamgipa chiko jakkalani aro janggi tangna cholrangko ra∙bana miksonge kam ka∙angenga. Chiring chibisikrangko tangkame rakkianina kam ka∙ani bidingoba Meghalaya a∙dok mingsing minggamako man∙gipa ong∙a. Forest Management Plans (FMP) ni gita 2022 bilsioni mikkangchi a∙dokna namgniko ra∙bana tarisamsoanikoba dakaha.
A·doko ge∙e game cha∙anio dingtang dingtang cholrangko jekai ge∙brinani, korosrangko komiate dakani aro a∙arangna namgijako ra∙bagiparangko naljoke ranta ka∙anirangko dakenga. Buring bolgrimrangko ripinge rakkina didiatna gita Payment for Ecosystem Scheme (PES) ko 2022 bilsio ra∙gataha jeon skanggipa re∙chakatanio hajal 17,100-hectare rangna bate a·arangko man∙e kamko ka∙anggen aro mikkangchi hajal 50-hectare rangni gita re∙baenggipa bilsi 5 o dal∙batatna miksongenga. Meghalaya a∙dok UNESCO o namgipa bimingko man∙gipaba ong∙a. A∙doko Mahatma Gandhi National Employment Guarantee Act 2005 aro uandake songsal noksalo a∙gilsako man∙enggiparangko baikame rakkina ja∙ku de∙enga. Ia kamrangna aro a∙gilsakko rongtalatna bimchipe re∙mikkanganina TV18 Network Meghalaya a∙dokna ia boksisko pakwatangaha.