Resubelpara C&RD block ni adita kam ka∙giparang Delhi o ong∙atenggipa Samvaad program o bak ra∙na NITI Aayog Office ona re∙angaha. Ian Prime Minister Narendra Modi ni re∙baenggipa September 30 tariko oprake on∙akenggipa Sankalp Saptaah Aspirational Block program ko a∙bachengatna miksonganiko aro kam ka∙ani bidingo talatani ong∙a. Sankalp Saptaah ko block ni gadango a∙bachengatna dakna nanggnirangko pilak bakko ra∙gipa official rangna skie on∙aniko dakangenga.
Ia program-o Resubelpara Block ni MGNREGS Assistant Program Officer (APO) Mac Laren K. Marak baksa Kash Deoripara aro Moamari songni Village Employment Council (VEC) Secretary sakgni, Diganta Rabha aro Renchi Sangma re∙ange skie ra∙ani cholrangko man∙enga. Uamang ia programo dongpae gipin a∙dokrango kam ka∙aniko ma∙sie ra∙e block tangko nambatatna mikkangchi manderangna skie on∙angskagen.
