Bilsi 19 ong·gipa me·asarangni Inter District Cricket Tournament kal·anio Tura District Cricket Association (TDCA) mijal salni bako West Jaintia Hills DCA ko amate bon·kamgipa kal·aniona sokdoangchenggipa dol ong·aha.
West Jaintia Hills DCA skanggipa dokchenge 40 over o sak 9 wicketrangko ga·akate 116 run rangkosan doltangna tarina gita man·aiaha. Ewanmidao Pyrtuh 24 run rangko tariaha aro Dawanchwami Passah 25 run ko doltangna man·e on·skaaha.
TDCA doloni Ben Haden N. Marak over 5 ko goanio sak 3 wicket rangko ra∙e chu∙gimik 9 run rangkosan man·ate on·aha. Fernando Barbaryo M. Sangma sak 2 wicket ko ra·e 21 rangko on∙aha aro Denikcheng Marak sak 2 wicket rangko ra∙e 25 run rangko on·skaaha.
WJH kal·ani a·bachengo name robol goanichi Tura DCA chu∙gimik 29 runko over 10 o man∙e sak 4 wicket rangko ga∙akgenchimoba Shahin Alone aro Jhon Venny sakgni doke 88 run rangko doltangna taridile over 24.5 o chena man·aha. Chwamiki Ryngklem chu∙gimik 27 runko on∙e sak 3 wicket ko WJH dolna ra∙angaha.
Da·alo apsan biapon gnigipa semifinal kal·anio Zone 2 ni skanggipa gadango ong·enggipa East Garo Hills DCA baksa Zone 1 Group A ni Shillong Cricket Association baksa kal·angskagen.