Adita salrangna skang All Garo Hills Anganwadi Worker & Helpers Association rang Tura-ni MP Agatha K. Sangmako gronge uamangni nanganirangko aro neng·nikanirangko nirokatchina gita mol·molaniko dakangaha. MP ko gronge dingtang mancha uamangni kamni kri man·anirangko nirokatchina, namgipa smartphone rangko on·china aro me·chikko supervisor dona a·kanggimin biapni giminba janapangaha.
Me·chikko supervisor na donanio u·i ma·sigipa aro kamo ru·ute ka·enggipa Anganwadi ko seokna nanga aro me·chik supervisor ni gital kamrangna 50% nigita biapko poraia skiani gadangko nichenggija ru·ute kamko ka·soenggiparangna a·kange donchinagitaba kamko ka∙enggipa dolrang didianiko dakangaha. Unbaksana dingtang dingtang health programme rangko ong·atanichi jekai polio kanani, TB sagiparangko am·sandianiko dakatani rangchi kam bang·dapataniko man·rongenga ineba u·iatangaha. Polio kannaniko dakanio salantio ASHA kamko ka·giparangna gong 100 aro Anganwadi rangna gong 75 kosan on·enga jeon apsan kamko ka·anio nitegija on·aniko dakchinagitaba uamangni dol mol·molaniko dakangaha.
