AITC ni dilgipa Dr. Mukul Sangma ko Congress dolona rimnapapilna partyni ge∙etaniko man∙ode ua re∙ange mol∙molna maming neng∙nikani dongjawa ine Congress ni dilgipa aro gitcham Cabinet Minister Deborah Marak mijal salo aganangaha. Uni aganani gitade re∙anggipa assembly pu∙onanio Congress doloni Mukul Sangma ong∙katjagenchimode Garo Hills o nambate dakna man∙genchim aro Chief Minister ong∙taina cholkoba man∙taigenchim ine Marak aganangaha.
Mukul Sangma ni party oni ong∙kataniara namjabatgipa ja∙ku deani ong∙aha aro Garo Hills ni Congress dolna namen dukniko ra∙baaha ine Marak parakangaha. Congress dol una bilko on∙genchimode Mukul Sangma kosan ua party ona re∙bapilna mol∙molaigija Nongthymmai ni MLA Charles Pyngrope koba rimbana jotton ka∙gen ine Marak aganangaha. Mukul Sangma aro unbaksa sak chi∙gni gipin MLA rangni Congress doloni ong∙kate AITC o napaniko an∙tangko so·ote sia gita ong∙a ine manderangni agananikoba Marak janape aganangjolaha.
