A∙songo Aspirational Block Program chi block rangko dingtangmancha namdapatna sorkarini ra∙bae on∙enggipa Sankalp Saptaah ko Prime Minister Narendra Modi, New Delhi Bharat Mandapam o da∙al salni bako oprake on∙angaha. Program ong∙ani somoio PM Modi sakgittam Block Level Officer rang baksa jawilwato golporimangaha jeon ua North Garo Hills ni BLO Mikehenchard Ch. Momin baksaba golporime Garo Hills ni gimin u∙ie ra∙angaha. Meghalaya a∙doko mikka waanirangchi neng∙nikaniko man∙ani bidingo PM Modi sing∙e ra∙angaha jeon ua somoina skang chu∙ongagita bosturangko ra∙chimonge donchina aro niroktimgipa dolrangko rakkichina didiangaha.
Garo Hills o man∙enggipa cashew nut rangko ge∙a gamani aro badingani bidingo sing∙on jolo man∙enggipa biterang a∙songo nambatsranggipaoni ge∙sa ong∙a ine Momin aganangaha. Unbaksana biteko ge∙na Self Help Group (SHG) rangna didianiko on∙enga jekon MNREGA ni scheme rangnigitaba kamrangko ka∙angenga ine Momin parakangaha. A∙jao cashew nut biterangko cha∙ani bimangona tarina damsa unit san donga ine PM Modi na janapa gnang damgipin unit rangkoba ra∙bae on∙china mol∙molangaha. Una agreba PM-Awas (Gramin) ni bidingo kam ka∙anirangko Narendra Modi sing∙e ra∙angjolaha.
