Batanggimin 2005 bilsini September 30 tariko MBOSE ko bak dakna am∙ani bidingo A∙chik jatrangoni sak 9 manderangni janggirangko gimaataona sokataha. September jani 30 tariko A∙chik jatni duk aro saknaaniko pangnan gisik ra∙anggen. Ia salo manderangni re∙jomaniko dakani somoio pulis dolrangni ka∙namgija slairangchi gopongponge Tura Chandmari playground-o sak 4 manderang aro Williamnagar Rongrenggre playground o sak 5 manderangko gulirang nanganichi saknaa man∙e uamangni janggi rangko gimaataona sokataha.
Ua salko dingtang mancha gisik ra∙nagita da∙al attamni bako Tura Chandmari aro Williamnagar Rongrenggre playground, dam gni biapo bi∙aniko dakangaha. Ia tom∙aniko GSU CEC HQ nigita ong∙ate adita toromni dilgiparang, NESO, Tura Government College Students’ Union, sianggiparangni ma∙drang maharirang aro ua salo a·sel ong·ako chagronggipa manderang bakko ra∙angaha. Sianggiparangko gisik ra∙e mande ra∙aniko dakna dingtang mancha candle light service ko ong·ate bi∙anirangkoba dakangaha.
