Dhubri-Phulbari ko kabatenggipa km 19 mang bakrogipa dollongko manderangni ru∙utbea bilsirangonin dabienggipa ong∙a jean matchotahaode bang·a kamrangna aro songre songgabatanio namen dakchakbeani ong∙gen ine Cabinet Minister AT Mondal parakangaha.
Ia rikenggipa dollong a∙song ge∙briko nangdimatgipa ong∙naba gnang chong∙motan India, Nepal, Bhutan aro Bangladesh ona sokange bang∙a nanganirangko chu∙sokataniona ra∙bagipa ong·gen ine Mondal ka∙dongsoaniko janapangaha. Dollongko jakkalanichi songdongenggipa manderangna bading chiwalanio, sanna bannanio, pala sim·ani, bosturangni dam rakani aro gipin neng∙nikanirangko chel∙atna dakchakanggen ineba ua agandapangaha.
Manderangni a∙dok damsaoni damgipinona songre songgabatanioba namen bakandikatbegipa ong∙gen aro somoirangko dikdiksana jakkale kon∙e re∙na nanggija songrena man∙genok ine Mondal parakangaha. Iachi a∙dokna kajina man∙anio aro janggi tanganio tang∙doatna namgipa cholko on∙anggen ine Mondal ka∙dongsoe kobor ra∙timgiparangna parakangaha. Una agreba ia dollongko matchotahaon a∙dokna bang∙a namgnirang aro dingtanganirangko ra∙bana bil amgen ineba ua aganangaha.
