Garobadha oni Dalu ona dakanggipa rama taridapenggipako Mahendraganj ni MLA aro Board of Directors Meghalaya Infratech & Innovations Corporation Limited ni Chairman Sanjay A. Sangma baksa SWGH a∙jani DC R. P. Marak mijal salo nirokaniko dakangaha.
Ian Mahendraganj, Nogorpara, Zikzak, Ampati, Betasing aro Garobadha songrangko nangdimatgipa rama ong∙a aro jolo songdonggipa manderangna re∙na dona jakkalna nanggipa mongsonggipa rama dilsa ong∙a. Ia rama gita Bangladeshona ro∙ong salgipa dal∙dalgipa truck garirang re∙ruraani a∙selo ramarangko nosto ong∙atronga aro rama jolo a∙kilokrang dongate salantio ia ramako jakkalgiparangna bang∙a neng∙nikanirangko on∙ronga.
Uandake bang∙a changon a∙sel ong∙anirangkoba knaronga, mongsongbate skulo poraienggipa bi∙sarangna kenchakbeani ong∙bata. Ia ramako ta∙rake taridape on∙genchimode songdongenggipa manderangna salanti re∙ruraanio neng∙nikaniko olgrokatna dakchakbeani ong∙gen jekon MLA ni re∙ange nirokean somoio tarake taripile on∙a jotton ka∙gen ine parakataha.
