Tourism Department aro Meghalayan Age Ltd ni bakrime Darjeeling o Trek Leader Training program ong·atgipao bak ra·e skie ra·nagita Resubelpara block ni sak gittam chadamberang seokako man·angaha.
Ia certified training programko sal chikkingna ong·atanggen jeon Trek The Himalayas dolrang skie on·anggen. Trek The Himalayas dolrangara Meghalaya a·doko adita salrangna a·bri maldoani bidingo skie on·gipa ge·sa agency ong·a. Unbaksana Trek The Himalayas dolrang Adventure Tour Operators Association of India (ATOAI) ni memberba ong·e dam 100 na batpile a·brirangko maldonagita Indian Mountaineering Foundation (IMF) ni hukum on·gimin ong·a. Ia programko October ni 2 tarikoni a·bachengataniko dake agan skie on·enba bosturangko Tura o sualaniko dakangskagen ine u·iatangaha.
Seokako man·gipa sak gittam chadamberang ia programo bak ra·na skang Resubelpara block ni BDO, District Tourist Officer aro JRDO ko grongangaha jeon ia trainingo bakko ra·angnagita be·en bimangko an·seng baljoke rakkina aro ranta ka·anirangko dakchina BDO didiangaha. Ia program aro training course rangko dakanichi NGH a·jana tang·doaniko ra·baani chol ong·gen aro a·jani gipin chadamberangna indakgipa chugipa gadangrango bakko ra·nagita didiani ong·anggen ine BDO agandapangaha.
