Bilsi 19 ni ning∙o ong∙gipa me∙sarangna BCCI ni ong∙atnakenggipa Vinoo Mankad Trophy o Meghalaya Cricket Association (MCA) dolni palo kal∙na sak 15 kal∙giparangko seokangaha. Ia tournament o kal∙na seokako man·giminrang batanggimin MCA U-19 Inter District Cricket Tournament ni somoio nambate dakgiparang ong∙a. Seokako man∙giparangoni A∙chikrangni gisepo Lensbirth N. Marak, Denikcheng Marak, Dingriko Marak, Bilgrak G. Sangma, skanggipa sak 15 seokgimino napangaha. Uamang baksa Thunun R. Marak aro Ferando B M. Sangma, bon∙kame seokako man∙angskaaha. MCA dolna gipin seoka man∙giparangara Shubham Rasaily, Kshitij Singhania, Avinash Rai, Rituraj Rabha, Angkit Tamang, Shahin Alome, Shavian Blah, Banialam J Mylliemngap, Josiah D Wanniang, Charm Marbaniang, Da-u-la-biang Shangpliang ong·a aro bon∙kamao Justin Fancon aro Dipankar Barua sakgniba seokako man∙giparang ong∙angaha.
Meghalaya chang bongana gipin a·dokrang baksa Andhra Pradesh a∙dokni Vijayawada songjinmao Bengal, Uttarakhand, Hyderabad, Delhi aro Maharashtra baksa kal∙susaaniko dakanggen. Ia kal∙susaaniona tarisamsoaniko da∙al saloni a∙bachengate October 8 tarikona Assamni Jagiroad-o dakanggen. Tarisamsoaniko dakna donsogimin sal matchotani bakan mongsonggipa kal∙chakram biapona uamang joljol re∙anganiko dakanggen. October 12 tariko Meghalaya dol Bengal baksa susaaniko dakanggen aro October 14 tariko Uttarakhand baksa kal∙susaaniko dakangskagen. Uni ja∙mano October 16 tariko Hyderabad baksa, October 18 tariko Delhi baksa aro October 20 tariko Maharashtra baksa kal∙susaaniko dakangskagen.
