North Garo Hills-ni Dilma A·pal, Mendipathar songo skanggipa changna Blitz Chess Tournament ko mijal salni bako ong·atangaha. Ia kal·aniona Garo Hills-ni dingtang dingtang biaprangoni chess kal·susagiparang re·bae sak 50 mangna batpile bakko ra·angaha. Ia kal·susaanio Silkam A. Sangma 9 point rangchi skanggipani biapko man·e chegipa ong·angaha. Gnigipani biapko Marcosh N. Marak man·angaha aro gittamgipani biapko Nityananda Hajong man·angskaaha.
Dingtang dingtang gadango kal·giparang uamangni bimchipe jotton ka·e kal·anio chu·sokgipa ong·e bimungrangko man·angaha. Francis A. Sangma Best Veteran player-ko man·aha, Amaziah Gapesa Ch. Marak Best Female player-ni bimungko man·angaha, Adora K. Marak uni nambee kal·anichi Best Youngest player-ni gadangko man·angaha aro Nikman G. Momin Best under-14 player ko man·angskaaha. Kal·susaanio chegiparagna Garo Hills Chess Association ni President Wilseng G. Marak aro Tura Music Academy-ni Director Tengrang Sangma ni jakchi boksisrangkoba on·angjolaha. Ia kal·susaani bako Tura Music Academy aro Minds Sanctuary ni dolrang doka damanirangko jakkale aro knatobee git ring·anirangkoba dakangaha.
