Turani ICFAI University aro North Eastern Career (NEC) Academy bakrime Integrated Training Course ko October 3 tarikoni a·bachengate anti dokna na ong·atna miksonge ICFAI University Campus o agantalate on·angan baksa oprake on·angjolaha. NEC Academy scheme, Chief Minister’s Career Guidance ba Career Counselling Scheme-ni ning·o donggipa ong·a jekon a·dok sorkarini Directorate of Sports & Youth Affairs dakchakaniko on·enga.
Tom·aniona Tura Aeroville Secondary School ko a·bachengdilgipa aro ICFAI University ni Advisor Dr. Viola Sonachi B. Sangma mongsonggipa sokgipa ong·e chatro chatrirangna aganskie on·aniko dakangaha. Iako ong·atanichi chatro chatrirangna changa sapaniko skie ra·na, namgniko talna, ning·tue ma·sina aro chanchianiko bariatna dakchakaniko on·gen ine program o agangiparang ka·dongsoaniko parakangaha.
Skie ra·ani matchotan somoio bakko ra·gipa sakantinan lekkarangko indin suale on·angan baksa gamchatgipa upadi bichitrangkoba suale on·anggen ine parakataha. Ia traning program ko dingtang mancha chatro chatrirangna rakbegipa porikkarangko sena aro uamangni bilni kri kamrangko seokna mikkangchi dilna miksonge ong·atangenga ine parakataha.
