Australia a·songni Brisbane songjinmao UNESCO ni dakchakaniko man∙e ong∙atgipa ASIA PACIFIC SCREEN AWARDS (APSA) o A∙chikrangoni Dominic Sangma ni tarigipa ‘RAPTURE’ ba ‘Rimdogittanga’ jawilwat Cultural Diversity Award ko man·baaha. Ia jawilwatko tariani somoio dakchakaniko on∙gipa bang∙a manderang mongsongbate A·chikrangni ka·saaniko aro chakpaaniko man∙anina Sangma dingtang mancha mittelangaha. Sakanti jatskani dakchakanichi chu·soknagita man·aniara jatna rasongko ra∙baani ong∙a ine Dominic Sangma aganangaha. Ia award ko man∙e chegipa ong∙na man∙anichi a∙gilsak dal∙begipa ong∙engchimoba, chonbegipa A∙chik jatko niksengata ine Sangma parakangaha.
Rimdogittanga jawilwat India, China aro Switzerland a∙song ge∙gittamni bakrime kam ka∙e bikotgipa ong∙a. Ia jawilwatko batanggimin salrango chang 76 gipa Locarno Film Festival, Switzerland o mesokaniko dakangaha. Apsan daken gipin dal∙dalgipa a∙damrangoba da∙o re∙baenggipa chang 28 gipa BUSAN International Film Festival aro Indian Film Festival rango bak ra∙na seokako man∙angaha.
