South Garo Hills, Pathalgittim aro South West Khasi Hills, Nongjri songo Bangladesh a∙songona badingatna tik ka∙e biming nakatgimin ni bidingo koelako chimongchakram biapo koela dongama dongja re·ange nirokeaniko dakchina Human Rights & Anti- Corruption Youth Power of India ni Working President Kingstone B. Marak aro Social Activist Ropul S. Marak, Retired Justice Katakey na chitti see mol∙molataha. Uni janapatani gitade ia koelarangko badingatna Ms Coal Traders aro George S. Marak ko Directorate of Mineral Resources (DMR) of Meghalaya ge∙etmanaha ine parakataha. Koelarangko badingnagita ua koela chimongchakram biaprango koelarangko nikna man·jani a·selo SGH ni manderang jajaaniko man∙enga ine uamang janapangaha.
Directorate of Mineral Resources (DMR) of Meghalaya, Ms Coal Traders aro George S. Marak ni ia biaprango koela dongja ine a∙kanggipa kattarangni kosako songni manderang matnanganirangkoba dakenga ine uamang janapangaha. 2023 bilsini gnigipa PIL ka∙gipao George Marak ni kosako Meghalaya High Court raka ja∙kuko de·chinaba ge∙etatmanaha ine agane niamgri koela badingsrukanio Marak an mongsonggipa ong∙a ine matnangangaha.
Kakketgipa sakkirangko ma∙sinagita koela danchakgipa a∙damona re∙ange nirokaniko dakchina aro man∙bagipa sakkirangko High Court ni mikkango parakchina uamang mol∙molangaha. Unbaksana Mining & Geology Department Secretary ko koelarangko badingna biming nakatatengon kakketgipa kamko ja∙rikchina didiangan baksa biapona re∙ange nigija skatang chittiko ra∙chakataigipa officer rangni kosako raka ja∙kuko de·chinaba mol∙molangaha.